“Студентската програма за размена Еразмус скоро и да не се споменува во бизнис рубриките во весниците, иако преку неа се создаде првата генерација на млади Европејци. Јас тоа го викам сексуална револуција - млад Каталонец запознава Фламанка и тие се вљубуваат, се венчаат и стануваат Европејци, како и нивните деца. Еразмус идејата треба да биде задолжителна, не само за студентите, туку и за таксистите, водоводџиите и останати работници. Под тоа подразбирам да минуваат време во други земји од ЕУ, да се интегрираат,“ изјавил Умберто Еко.
“Со сите свои недостатоци, глобалниот пазар војната ја прави помалку возможна, дури и помеѓу САД и Кина. Европа никогаш нема да биде Соединети европски држави, една земја со заеднички јазик како Соединетите американски држави. Мислам дека нема диспаритет меѓу Лисабон и Варшава, како што нема меѓу Сан Франциско и Њујорк. Ќе останеме федерација, но нерастворлива,“ смета Умберто Еко.
Културата, продолжува Еко, а не војните, може да го цементираат европскиот идентитет. Прашан да го опише европскиот идентитет во 2012-та, Еко одговара дека е широко распространет но површен, па вели ова морало да се смени пред кризата да ја соголи Европа.

“Кога станува збор за должничката криза, а јас зборувам како некој што не се разбира од економија, мора да запомниме дека културата е она што го зацврстува европскиот идентитет. Французите, Италијанците, Германците, Шпанците и Англичаните потрошија векови убивајќи се меѓу себе. Мир владее веќе 70 години и никој не сфаќа колку е тоа прекрасно. На САД им требаше граѓанска војна за да се обединат како што треба. Се надевам дека за нас тоа ќе го направат културата и европскиот пазар,“ изјавил Еко.

Во идејата на писателот за силен европски идентитет нема место за банкноти со ликови на политичари и лидери, кои вели разделуваат, туку само со луѓе од културата како Данте, Шекспир и Балзак, кои според Еко го засилуваат духот на единство.