Том Пети: моите омилени песни од Елвис Присли |
Том Пети: моите омилени песни од Елвис Присли
Кога Том Пети имал 10 години, вујко му работел на снимањето на филмот на Елвис Присли, Follow That Dream, и Пети наминал. „Пристигна со група бели Кадилаци“, вели Пети. „Луѓето врескаа, подавајќи преку оградата плочи да им ги потпише. Се сеќавам дека косата му беше толку црна што сонцето се одбиваше од неа. Од само еден обичен поздрав со него кожата ќе ти се наежеше. Бев возбуден со недели. Се заразив и се обидував да ја најдам секоја негова плоча, и навистина ги преслушував. Елвис стана саундтракот на моите млади години.“
| « врати се назад |
1. That's All Right, 1954
Елвис и неговиот бенд се зафркаваа со песнава после снимањето во студиото Sun, и Сем Филипс веднаш ја слушна. Тоа беше прилично опскурна песна на Артур Крадап и ми се чинеше неверојатно тоа што Елвис ја знаеше. Навистина ѝ даде свој печат. Материјалот снимен во Sun е висока уметност. Толку е чиста, а имате чувство дека откривате нешто ново.
2. Baby Let's Play House, 1955
Оригиналот на Артур Гантер беше прилично опскурна блуз нумера и супер снимка. Но во верзијата на Елвис има нешто што звучи како да е од друг свет. Скот Мур секогаш беше потценет гитарист. Во песнава свири сè и ги покрива сите дупки. А кога свири соло, звучи како да е од Марс.
3. Heartbrake hotel, 1956
Песнава можеше да биде државна химна. Супер е, а кога доаѓа пијаното зазвучува многу сензуално. Песната е многу морничава и многу празна - има само бас и малку пијано, со длабоката атмосфера што ја создава диџеј Фонтана.
4. Hound Dog, 1956
Ја сакам верзијата на Биг Мама Торнтон, но Елвис ѝ го смени полот на песната и направи целосно негова песна. Каков вокал!
5. Mean Woman Blues, 1957
„She kiss so hard she bruise my lips/Hurts so good my heart just flips.“ Тоа беа прилично тешки стихови за мало дете како мене. Ги вметна The Jordanaires како придружни вокали и ги искористи како ритмички инструмент, што обично се правеше во старата госпел музика. Тоа ѝ даде на песната сосема друга димензија.
6. One Night, 1958
Елвис го смени текстот од верзијата на Фет Домино, од „One night of sin is what I'm paying for“ во „One night with you is what I'm now praying for“, што е одлична промена. Почнува како стандарден блуз, но потоа тргнува во сосема неочекувана, изненадувачка насока. Божествено!
7. Santa Claus Is Back in Town, 1957
„Santa Claus is coming down your chimney tonight“ звучи апсолутно валкано кога Елвис го пее. Ова е можеби неговата најдобра блуз вокална изведба, со оние паузи што никој освен него не може да ги направи.
8. Can't Help Falling in Love, 1961
Секогаш кога ја пуштаа на радио паѓав во несвест. Го претпочитам оној Елвис пред да оди во војска во 1958, но направи неколку добри работи и откако се врати. Не беше сè завршено.
9. A Mess of Blues, 1960
Ова е една од првите песни што ги сними откако се врати од војска во 1960, со неговиот одличен бенд од Нешвил - еден од најдобрите во тоа време. Текстот е тажен, но тој звучи триумфално.
10. (Marie's the Name) His Latest Flame, 1961
Акустичната гитара и тапанот на кој се удира со четки го држат ритамот, но кога доаѓа 6-жичениот бас и пијаното оди во високите регистри, целата песна просто излетува од звучникот. Порано имав лента со различни изведби. Во почетокот песната беше несредена, а на крајот беше направен овој убав аранжман.
Via Rolling Stone
