Во музејот ќе биде сместена колекцијата на Бил Милер, долгогодишен пријател и основач на сајтот за Џони Кеш, како и сведоштва на пријателите, колегите и членовите на семејството.

Во колекцијата на Милер има стари писма од Кеш, негови ракописи, документи и ракопис од последната песна што ја напишал неколку дена пред смртта на 12 септември 2003.

Милер вели дека музејот ќе биде тродимензионално патување низ животот на Џони Кеш, овозможено од соработката со Griffin Technologies.

„Ова е работа во која вложив најмногу љубов, покрај раѓањето на моите деца и мојата прекрасна жена“, изјави Милер.

Џон Картер Кеш, синот на Џони, изјави дека музејот ќе понуди вистинска слика за неговиот татко и ќе овозможи подобар увид во неговиот дух.

Музејот во Нешвил не е првиот во чест на Џони Кеш. Претходно беше изграден музеј во Хендерсонвил, но беше затворен откако мајка му почина во 1990.

Но, музејот не е единствен доказ дека духот на Кеш и понатаму живее. На 3 април годинава Sony Music Entertainment ќе издаде двоен диск со госпел и духовна музика на која Кеш работел во 70-те и 80-те. Некои од песните на компилацијата ќе бидат објавени за прв пат.