Стотици жители на Европа починаа од студ, а илјадници се отсечени од цивилизацијата. Замрзна Дунав, втората најдолга река во Европа. Воз во Црна Гора 3 дена остана заглавен на шините. Замрзна дури и популарниот канал во Венеција, што е голема реткост.

Откако научниците од НАСА одлучиле детално да се позанимаваат со оваа екстремна европска зима, откриле дека студот доаѓа од Русија. 

Од таму објаснуваат дека станува збор за климатска шема позната како "руска зима", во која силното поле на антициклони од Сибир, се задржува над северот на Русија и во остатокот од Европа предизвикува мразови и снег.

Анализирајќи го студот на Балканот, метеорологот од веб страната AccuWeather.com, Џим Ендрјуз нагласил дека ледениот бран во Белград е најлошиот во последните неколку децении.

"Се навратив 20 години наназад и најдов само неколку значајни студени периоди, но ниту еден не беше толку остар како овој", вели тој.

Како пример го навел 13-ти јануари 2003-та година, кога температурата во Белград паднала на -24 степени Целзиусови, а 1 дена подоцна се вратила на 8 степени над нулата. Од 29-ти јануари до 13-ти февруари годинава, дневната температура била за 6 степени пониска од просечната за овој период од годината.