Вулф го објави повлекувањето од позицијата во телевизиско обраќање, во кое рекол дека "на Германија и треба претседател кој ќе може комплетно да им се посвети на националните и меѓународни предизвици".

"Развојот на настаните од последните неколку недели покажаа дека довербата во мојата способност да и служам на државата е сериозно разнишана. Затоа не постои никаква можност да останам претседател", изјавил Вулф.

Причина за ваквата одлука на првиот човек на Германија е барањето на обвинителите да му се укине имунитетот заради истрагата околу сомнението дека примал непијавени парични подароци, одел на бесплатни одмори и привилегирал богати бизнисмени. Тоа беше прв пат во историјата на модерна Германија, да се побара укинување имунитет на претседател.

Заради оставката на Вулф, Меркел морала да ја откаже посетата на Рим, а од нејзиниот кабинет најавуваат дека таа се подготвува да даде изјава за скандалот.

Претседателот во Германија има многу мала политичка моќ, но оставката на Вулф претставува значаен удар за канцеларката Меркел, која ја поддржа неговата кандидатура.

52-годишниот Вулф беше вовлечен во скандал кон средината на декември 2011-та година, кога беше објавена информација дека во времето кога бил гувернер на Долна Саксонија добил голем приватен кредит за изградба на неговата куќа.

Аферата уште повеќе се разгоре кога се дозна дека Вулф се обидел да го спречи објавувањето на веста во Билд, јавувајќи му се на уредникот на овој најтиражен германски весник и истурајќи го својот бес врз него.