Станува збор за многу драстичен потег, бидејќи сè досега единствен начин на кој Твитер можеше да им се покори на рестрикциите во одредени земји, беше преку бришење на контентот глобално.

Од компанијата велат дека отсега ќе бришат твитови само доколку има реакции од властите, а корисникот кој бил цензуриран ќе биде известен за причините.

"Ќе продолжиме да ја одбраниме слободата на говорот и ќе дадеме сè од себе да не бришеме твитови. И да се разбереме, ова не значи промена на нашата филозофија и сè уште ќе има земји во кои нема да одиме", изјавила портпаролката на Твитер, Џоди Олсон.

Како пример за земји кои ќе бидат подложни на цензура, спомнати се Германија и Франција, кои забрануваат про-нацистичка содржина. Таму Твитер ќе ги цензурира само таквите твитови.

Меѓу другото, Олсон напоменала и дека постојат земји кои толку ја задушуваат слободата на говорот, што Твитер едноставно не може да функционира таму. Иако од компанијата ветуваат дека ќе продолжат да го бранат и почитуваат гласот на корисникот, еден независен набљудувач тврди дека станува збор за класична цензура.

"Твитер не е над законот. Во случај на владин налог, компанијата има само 2 опции: да одбие и да ризикува блокада на сервисот или да се покори, односно да цензурира", коментира Џилијан Јорк, директор на меѓународната фондација за слобода на говорот, Електроник Фронтиер. 

Одлуката на Твитер да цензурира содржина значи напуштање на политиката од пред 1 година, кога анти-владините протести во Тунис, Египет и другите арапски земји беа координирани токму преку социјалните мрежи.

Новата промена на правилата доаѓа во време кога интернет компаниите, како Гугл и Фејсбук се во конфликт со странските влади, околу слободата на говорот и проблемите со приватноста на корисниците.