Пред 12.500 гледачи во Олимписката арена во Минхен, Кличко со едногласна одлука на судиите (118:110, 118:110 и 119:111) го порази Чисора.

Предизвикувачот ја зголеми тензијата откако прво на официјалното мерење му удри шамар на Кличко, а провокациите продолжија и непосредно пред борбата, oоткако со вода го исплука во рингот помладиот брат Владимир Кличко.

Сепак кога почна борбата сите закани на Чисора се покажаа како бесмислени, бидејќи Кличко успешно го диктираше темпото и од рунда во рунда ја зголемуваше бодовната предност.

Чисора прв пат успеа да го загрози Украинецот во шестата рунда, но Виталиј ги користеше противударите со кој го рушеше гардот на противникот, па на крајот заслужено славеше.

"Ова беше тежок меч за мене, среќен сум што ја одбранив титулата, бидејќи не беше лесно. Чисора беше многу мотивиран и вршеше притисок кон мене во сите 12 рунди. Но и покрај тоа тој беше многу спор, ги видов сите негови удари. Освен што неколку пати малку ме закачи, не почувствував ништо повеќе", истакна Кличко и продолжи:

"Јас го почитувам него како борец, но не и како човек. Чисора е срам за боксерскиот свет. Иако доаѓа од Велика Британија, тој не е господин. Да бидам искрен сакав да го нокаутирам. Сакав да му го дадам она што го заслужува. Не успеав, но животот е интересен и долг можеби некој пат повторно ќе се сретнеме", рече Кличко.