Почетокот на натпреварот беше максимално израмнет и двата тима се менуваа во водство, но ниту една репрезентација не направи предност од два гола. Дури во 22-та минута Хрватска успеа да поведе со 9:11.

Израмнетата игра продолжи до крајот на првиот дел, а на паузата Хрватска замина со минимална предност од 13:14.

Во текот на целото прво полувреме ракометарите на двете репрезентации имаа одличен процент на реализација, па така голманот на Србија и член на скопски Металург, Дарко Станиќ кој блескаше во досегашниот тек на првенството, по првите 30 минути успеа да одбрани само еден удар кон неговиот гол.

По десет минути игра во вториот дел Србија направи серија од 4:0 и за прв пат на натпреварот поведе со два разлика (16:14).

Србија во второто полувреме на својот гол го имаше далеку порасположениот голман Станиќ и со помош на неговите одбрани во 45-та минута поведоа и со четири разлика (21:17).

Ракометарите на Србија продолжија со сигурната игра и во 53-та минута успеаја да стигнат до предност и од пет голови (25:20). До крајот домаќините го одржуваа своето водство и триумфираа со 26:22.

Најефикасен за Србија беше Момир Илиќ со осум голови, а Станиќ имаше 12 успешни одбрани. Во редовите на Хрватска најефикасен беше Марко Копљар со седум голови.

Финалето на Европското првенство помеѓу Србија и Данска ќе се одигра во недела од 17 часот, а од 14:30 во натпревар за третото место ќе се сретнат Шпанија и Хрватска.