Во интересен и неизвесен натпревар, екипата на Металург имаше шанси да победи, но беше и пред пораз, а на крајот двете екипи ги поделија поените.

На четири минути пред крајот на натпреварот, Цимос Копер имаше водство од 22:19, но благодарение на неколкуте нивни грешки, како и фантастичниот голман Дарко Станиќ, ракометарите на Металург со серија од три голови израмни на 22:22.

Со играч помалку, Металург имаше шанса да постигне и победнички гол, но Георгиевски не го искористи последниот напад, а на спротивната страна Миркуловски го спречи противнападот и заработи црвен картон. Во последните секунди Копер со два играчи повеќе имаше шанси да постигне гол, но Кривокапиќ ја погоди стативата.

Најефикасни кај Металург беа Марковиќ со шест и Козлина со четири погодоци, а Дарко Станиќ оствари неверојатни 18 одбрани.

На првото место на табелата во групата Ц се наоѓа Хамбург со 14 поени, следат Металург и Цимос Копер со по 10, а на четвртата позиција со седум поени е екипата на Орлен Висла Плок, следниот противник на Металург.