Нема веќе непоразени екипи во регионалната ракометна СЕХА лига. Металург загуби на гостувањето во Нашице од екипата на Нексе која успеа да одземе и бод во Скопје кога натпреварот заврши со резултатот 26:26.

Дуелот во Хрватска беше израмнет, но домаќините ја имаа иницијативата во поголемиот дел од натпреварот. Ракометарите на Металург дојдоа до водство на почетокот од второто полувреме (17:18), но во продолжението Нексе ја контролираше играта и во финишот направи недостижно водство од 29:25 кое Металург до крајот само го намали за конечни 29:27.

Најефикасни во редовите на Металург беа Козлина со осум и Марковиќ со седум погодоци, а домаќините успешно го спречија Наумче Мојсовски кој постигна само два гола.

По 12 одиграни натпревари (8-3-1), Металург се наоѓа на четвртата позиција со 27 поени. На табелата води Загреб со 38 пред Вардар со 35, но тие имаат по 15 одиграни натпревари, а на третата позиција е Татран со 28 поени по 14 натпревари.