На стартот Словенија поведе со 0:2, но нашите ракометари направија пресврт, влегоа во серија постигнувајќи пет гола за 5:2.

Во 12. минута Зорман намали на 5:4, сепак повторно успеавме да се одлепиме со четири гола во низа за водство од 9:5. Во тие моменти блескаше Борко Ристовски со седум одбрани и два успешно одбранети седмерци.

Алушовски и Стоилов постигнаа по два гола во финалните десет минути од првото полувреме кое заврши со погодок на капитенот Кире Лазаров во последната секунда за водство 16:12. Лазаров го постигна својот петти гол и негов 58 на првенството со што се изедначи со Олафур Стефансон.

На стартот од второто полувреме Стоилов го врати водството од пет голови (17:12), но со серија од три гола, Словенците бргу намалија на 17:15.

По голот на Темелков за 18:15, македонските ракометари влегоа во криза, која Словенија ја искористи и постигна пет голови за пресврт од 18:20.

Лошата серија од седум минути без постигнат гол ја прекина Алушовски кој во 43-та минута намали на 19:20, но Словенија и со играч помалку веднаш возврати и си го врати водството од два гола.

Во 48-та минута од натпреварот Кире Лазаров го постигна својот шестти гол, вкупно 59-ти на ова првенство со што стана најдобар стрелец на Европските првенства.

Ова беше период на Македонија кога со серија од 4:0 нашите ракометари направија предност од 25:22.

Неизвесноста продолжи до самиот крај, но нашите ракометари во ниту еден момент не дозволи ново израмнување и на крајот извојуваа победа од 28:27.

Со оваа победа ракометната репрезентација на Македонија го освои петтото место на Европското ракометно првенство во Србија, а со тоа избори и пласман на квалификацискиот турнир за Олимписките игри во Лондон.

Најефикасен во нашата репрезентација беше Кире Лазаров со 8 голови, Стојанче Стоилов постигна шест, а Стевче Алушоски четири. На нашиот гол повторно одличен беше Борко Ристовски кој на овој натпревар одбрани 11 удари кон неговиот гол.