Со победата од 28:27 над Словенија, ракометната репрезентација на Македонија го освои петтото место на Европското првенство, а со тоа и загарантирано место во квалификациите за Олимписките игри во Лондон. По натпреварот, импресиите од дуелот со Словенија и целото првенство на прес-конференција за новинарите ги споделија капитенот Кире Лазаров и селекторот Звонко Шундовски.

„Некој би помислил дека ќе го завршиме натпреварувањето со жалење за пропуштената шанса за пласман во полуфиналето, но јас не се каам поради тоа, затоа што го оставивме срцето на теренот.“

„Убеден сум дека доколку покажеме иста посветеност на престојниот квалификациски турнир, можеме да обезбедиме виза за Олимписките игри во Лондон.“

„Драго ми е што нашиот голман Борко Ристовски го спаси овој ден, бидејќи тој е еден од најхрабрите играчи во нашиот тим и мој многу драг пријател“, изјави Кире Лазаров.

„Многу сум среќен поради оваа победа. Наша цел пред првенството беше да избориме олимписки квалификации, а тоа беше реална цел и со нашиот борбен дух и големото срце успеавме. Им благодариме и на нашите навивачи кои силно нé бодреа на секој натпревар“, рече селекторот Шундовски.