Од тимот на ХРТ објавија дека ја комплетирале возачката двојка за 2012 година, а покрај Шпанецот Педро де ла Роса, втора година по ред во истиот тим ќе вози и Картикејан.

Болидите на ХРТ во следната недела ќе започнат со тестирање на патеката во Херез, прво Де ла Роса, а потоа на 21 февруари на патеката во Каталуња ќе тестира и Картикејан.

"Минатата година многу работев и затоа сум среќен што повторно добив шанса во тимот на ХРТ. Со нетрпение го очекувам настапот пред домашните навивачи за Големата награда на Индија", истакна Картикејан, кој во кариерата завршил 28 трки.

Шефот на ХРТ, Луис Перез Сала е среќен заради договорот со Индиецот.

"Тој е многу брз, интуитивен и сигурен возач кој ги исполни нашите очекувања и покрај недостатокот на континуитет во минатата сезона. На девет трки само еднаш не стигна до целта, а уверен сум дека континуитетот ќе му овозможи да направи чекор напред во кариерата", рече Перез Сала.