Минатата сезона, која беше премиерна за Роси во тимот на Дукати за прв пат во неговата кариера не забележи ниту една победа во Мото ГП шампионатот.

Италијанецот вели дека му е цел да остане во Мото ГП првенството и по крајот на оваа сезона и дека најидеално би било да го врати Дукати на врвот пред да реши да го напушти овој спорт.

"Во текот на сезоната работите ќе бидат многу интересни затоа што на возачите им истекуваат договорите и картите ќе бидат измешани. Искрено не знам ништо по прашање на мојата иднина. Би сакал Дукати да биде брз и да имам можност да освојам нешто и потоа да се повлечам, но не сега. Сакам да се натпреварувам уште неколку години, да остварам уште некои добри резултати и тоа е мојата цел, но постојат уште многу можности. Би сакал барем уште две години да останам во Мото ГП шампионатот", изјави популарниот "Доктор".

Роси истакна дека се уште не размислува за 2013. година затоа што не сака тоа да му го одвлекува вниманието во намерата да ги подобри своите резултати со Дукати во претстојната сезона.

"Мислам дека преговорите за новиот договор ќе започнат во текот на сезоната, бидејќи треба да се организираме за 2013. година. Не сакам тоа да го направиме прерано затоа што ризикуваме губење на концентрацијата во борбата за титулата, но сигурно се ќе решиме кога ќе дојде време за тоа", вели Роси.

Мото ГП шампионатот стартува со Големата награда на Катар на 8. април.