Македонските херои од Литванија, Перо Антиќ, Тодор Гечевски, Ѓорѓи Чековски, Војдан Стојановски, Марко Симоновски, Дарко Соколов и Ивица Димчевски, заедно со Кирил Николовски, Горан Самарџиев, Диме Тасовски, Јане Петровски и Горјан Марковски одиграа одличен натпревар, полн со кошеви, атракции и цепелини против странците што настапуваат во Македонската Прва лига (Џастин Рејнолдс, Џеремаја Босвел, Карлос Морбан, Мавел Солер, Брендон Кол, Владимир Зујовиќ, Милош Павловиќ, Ѓорѓе Јовановиќ и Владимир Филиповиќ).

Резултатот беше во втор план, но заврши 134:110 за кошаркарите од Македонија, а победи хуманоста и поддршката за децата од СОС детското село.

Универзитетот ФОН, кој поддржан од МКФ и Американската амбасада го организираше овој настан, ги донираше сите собрани средства и се заблагодари на сите кои придонесоа со желба да се помогне на оние кои им е најпотребно. "Убаво е чувството кога ќе можете да помогнете. Да бидете заедно со голем број дечиња на кои им е потребна само љубов, а ние сме тука подготвени да дариме љубов. Прекрасно е кога ќе ги видите сите овие насмеани лица", изјави Перо Антиќ по натпреварот.

Инаку, покрај собраните средства од продадени влезници, во хуманитарната акција „Имај срце, дарувај!“ средства се собираа и преку телефонски повици во текот на натпреварот, од страна на некои македонски музички и спортски ѕвезди.