Најголемите заслуги за триумфот на Лејкерси одат кај По Гасол, кој прво избори продолжение, а потоа го блокираше шутот на Реј Ален за победа.

Шпанскиот центар мечот го заврши со 25 поени и 14 скока, додека Коби Брајант уфрли 27 коша.

Во составот на Бостон, кој ја прекина серијата од пет триумфи по ред, Реј Ален реализира 22 коша, а Пол Пирс беше стрелец на 18 поени.

Сакраменто го изненади најдобриот тим во лигата Оклахома и го совлада со 106:101. "Кралевите" последните девет поени ги постигнаа од линијата за слободни фрлања. Тајрик Еванс забележа 22 поени, а Демаркус Казинс го следеше со 19 поени и девет скока.

Расел Вестбрук постигна 33 поени за Тандерс, но имаше седум загубени топки, од кои една во самиот финиш што влијаеше за поразот на неговата екипа. Кевин Дурент даде 27 поени, а Серж Ибака не се истакна кошгетерски, но затоа имаше неверојатни 10 блокади.

Хјустон беше подобар во дуелот со Феникс и триумфира со 96:89. Рокетси ја остварија третата последователна победа благодарение на играчите од клупата кои постигнаа вкупно 57 поени. Луис Скола беше најпрецизен со 16 коша.

Во Феникс се истакна Ченинг Фрај со 21 поен и 10 скока.

Денвер влезе во серија порази (петти во низа), откако загуби на домашен терен од Голден Стејт со 101:109. Одлична партија прикажа Стивен Кари со 36 поени и по седум скока и асистенции.

Бостон - ЛА Лејкерс 87:88 (во продолжение)
Денвер - Голден Стејт 101:109
Феникс - Хјустон 89:96
Сакраменто - Оклахома 106:101