Лирија ја имаше контролата врз резултатот и беше рамноправен противник до третиот период, кога и беше во водство, но преку Кирил Николовски, Душан Кнежевиќ и Соколов, гостите од Кавадарци не дозволија изненадување и славеа во третиот меѓусебен дуел против тимот од Сарај.

Кнежевиќ беше незапирлив со 27 коша, Кире Николовски придодаде 17 поени и осум скока, а 17 коша постигна и Соколов.

Во редовите на Лирија, најистакнат поединец беше Диме Тасовски со 23 поени, но во последниот период беше добро затворен од гостинските кошаркари.

Во натпревар со многу пресврти Торус го совлада Работнички со 75:67. Торус имаше и 16 поени предност во второто полувреме, но екипата од Градски парк со серија поени ја стопи предноста на домаќините на само еден поен (53:52).

Торус во финишот постигна седум поени во низа и со добра реализација од слободни фрлања стигна до победата.

Американецот Џастин Рејнолдс беше најефикасен со 21 поен и седум скока, додека кај Работнички, Зујовиќ уфрли 17 коша.

МЗТ и без повредениот Тоше Гечевски оствари победа на гости во Куманово од 98:83. Лидер на "металците" беше Ноа Далман со 24 поени, а Чековски придодаде 15 коша и 10 скока.

Милан Јанушевиќ беше прво име кај домашните со 29 поени и седум скока.

Резултати, 3 коло, Суперлига:

Лирија - Фени индустри 86:94

Торус СЦБТ - Работнички 75:67

Куманово - МЗТ Скопје 83:98