Од моментот кога Капело поднесе оставка од функцијата селектор на Англија, Хари Реднап се наоѓа под огромен притисок.

Скоро цела Британија е едногласна дека искусниот менаџер на Тотенхем е идеален за оваа функција. Тој најпрвин се дистанцираше од селекторската позиција, но во меѓувреме го промени ставот.

„Ми годи тоа што моите колеги имаат добро мислење за мене, но во моментов сум фокусиран на работата со Тотенхем“, изјави Реднап и го најави проблемот.

Во Англија е незамисливо селекторот на репрезентацијата во исто време да биде и менаџер на клуб, па или Реднап ќе мора да поднесе оставка или пак Фудбалската асоцијација ќе мора да направи отстапка.

Ривалот на Реднап од Лондон, менаџерот на Арсенал, Арсен Венгер не гледа ништо спорно во тоа Реднап да ја задржи функцијата во Тотенхем и да го преземе националниот тим. Според него, најважно е наследникот на Капело да биде Англичанец и се согласи дека Реднап е идеален избор.

Менаџерот на Ливерпул, Шкотланѓанецот Кени Далглиш најпрво се пошегува дека единствен логичен избор би бил неговиот сонародник Алекс Фергусон, но потоа даде сериозен одговор:

„Хари Реднап би бил фантастичен избор“.

Во меѓувреме својот глас за Реднап го даде и самиот Фергусон, но тој напомена дека е тешко да се води и репрезентација и клуб. Фергусон потсети дека тој им лошо искуство кога како менаџер на Абердин ја предводеше и репрезентацијата на Шкотска.

Сепак не навлегувајќи во тоа дали Реднап би работел паралелно во Тотенхем и репрезентацијата, тој изјави:

„Тој е идеален и би бил вистински избор. Некој помлад тренер не би можел да го работи тоа“.