Натпреварот помеѓу Манчестер Јунајтед и Ливерпул уште не беше ни започнат, а веќе летаа искри на теренот. По суспензијата од седум натпревари заради расистички навреди над Патрис Евра, во почетниот состав за Ливерпул се најде и Луис Суарез. Тој одби да се ракува со Евра, што предизвика гневна реакција од страна на Французинот кој го повлече Суарез за рака, но соиграчите и судијата ја смирија ситуацијата.

Првата шанса на натпреварот ја имаше Ливерпул кога Глен Џонсон се проби по десната страна, но неговиот удар заврши на само неколку сантиметри покрај левата статива.

На спротивната страна најсериозната шанса во првото полувреме ја имаше Пол Сколс, но Реина го одбрани неговиот удар со глава во 31-та минута.

За време на паузата за полувремето од натпреварот, во тунелот пред соблекувалните, Евра и Суарез влегле во нов дуел, а се приклучиле и нивните соиграчи по морале да интервенираат обезбедувањето и полицијата.

Домаќините дојдоа до големо водство од два гола во рок од три минути на самиот старт од второто полувреме. По корнер во 47-та минута, топката дојде до Руни кој со волеј удар ја смести топката во мрежата. Во 50-та минута Валенсија украде една топка и го проигра Руни кој искочи сам пред голманот Реина и без проблеми зголеми на 2:0.

Ливерпул ја врати неизвесноста во 80-та минута кога во 80-та минута Рио Фердинанд не успеа да ја исконтролира топката и му ја препушти на Луис Суарез кој од близу го совлада Де Хеа.

Фудбалерите на Ливерпул во продолжението од натпреварот се обидоа да дојдат до израмнување, но во финишот Де Хеа успеа да одбрани добар удар од Џонсон и натпреварот заврши со победа на Манчестер Јунајтед од 2:1.

На останатите натпревари, Арсенал со голот на Тиери Анри во 91-та минута го победи Сандерленд со 2:1, Челси падна на гостувањето кај Евертон (2:0), Тотенхем го декласираше Њукасл со 5:0, а победи забележаа и Норич, Виган, Блекбурн и Фулам.

Премиер лига, 25. коло

сабота:
Манчестер Јунајтед - Ливерпул 2:1
Руни 47, 50 - Суарез 80

Блекбурн - Квинс Парк Ренџерс 3:2
Јакубу 15, Нзонзи 23, Онуоха 44аг – Меки 71, 90

Болтон - Виган 1:2
Дејвис 67 – Калдвел 43, Мекартур 76

Евертон - Челси 2:0
Пиенар 5, Стракуалурси 71

Фулам - Стоук Сити 2:1
Погребњак 16, Соренсен 28аг – Шоукрос 78

Сандерленд - Арсенал 1:2
Меклин 70 – Ремзи 75, Анри 90

Свонси - Норич 2:3
Греем 23, 87 – Холт 47, 63, Пикингтон 51

Тотенхем - Њукасл 5:0
Асу-Екото 4, Саха 6, 20, Крањчар 34, Адебајор 65

недела:
Вулверхемптон - ВБА 14:30ч
Астон Вила - Манчестер Сити 17:00ч